نصائح ل برج الحمل

الحمل
أنت طيب ومحبوب كتير من الآخرين عندك كاريزما خاصة وروح مميزة بس انتبه من الأشيا يلي بتأذيك .. عصبيتك وانانيتك يلي مابتنتبه إلها أحيانا .. دايما حط حالك مكان الشخص يلي عم تتعامل معو وخاصة بالمجال العاطفي سيطر على انفعالاتك وتذكر مكانة الأشخاص عندك قبل ما تنفجر بوجهن خليك بقلبك الطيب ومحبة الناس إلك وهيك بدنا تكون ..

نصائح ل برج الثور

الثور
أنت حدا طيب كتير هادي ورايق بتبحث دايما عن المتعة وبتحب تتعامل مع الناس بطريقة تصل فيها لقلوب الكل مشان هيك بدي منك تكون متفهم ومستوعب لرأي يلي معك وما تنتقد تصرفاتن بقسوة خليك مساير نوعا ما لأن مو دايما أنت الصح كون مرن بالتعامل واترك الناس تساعدك لتكون حياتك مشتركة معن ..

نصائح ل برج الجوزاء

الجوزاء
قدرتك الكبيرة عالتأقلم وعلاقاتك القوية وحسن تصرفك بأغلب المواقف شي كتير منيح بس لاتحاول تقلل من اهمية الآخرين ودايما خلي مصلحة الجميع فوق الكل يمكن شعور القلق عندك بسبب تفكيرك الكبير وهاد الشي طبيعي لكن حاول تساعد الناس وتوصل فكرة صح عن الجوزاء يلي بيمتلك أفكار رائعة بأي عمل أو مشروع ..

نصائح ل برج السرطان

السرطان.
يلي بيتعامل معك بحس بحجم العاطفة يلي بتمتلكها والحنان يلي بعيونك وعندك كتير صفات ايجابية بتصل فيها لقلوب الناس بس ابتعد عن الوسواس والخوف من القادم لاتكون سلبي وحاول تكون متفائل لأن الحساسية عندك مرتفعة كتير وهالشي بخليك بحالة مو منيحة من أقل المواقف لازم تبقى قوي ويكون عندك نظرة ايجابية لكل شي حتى تحصل على الدعم المعنوي اللازم لتكون حياتك أفضل ..

نصائح ل برج الاسد

الأسد
القوة يلي بشخصيتك بتعطي انطباع بعظمة هاد الشخص يلي عم نتعامل معو كتير من الحنية والكرم يلي بيظهروا اثناء التعامل معك بس انتبه جدا من غرورك وتملكك يلي ما ممكن تعترف فين بس الناس بتشوفن مشان هيك حاول تتفهم نظرة غيرك الك وتضل بعيد عن هدول الصفتين قدر الأمكان لتبقى مثال لغيرك ..

نصائح ل برج العذراء

العذراء
انت الباحث عن الكمال بشخصيتك بتصرفاتك بشكلك بنجاحك حتى هي من أهم الأشياء يلي بتعزز مكانتك عند الكل بس إذا أنت بدك تصل للكمال في ناس كتير ما بتفكر متلك أو ما بتشوف التفاصيل الصغيرة بحياتها فانتبه نظرتك الدقيقة ممكن تأذي غيرك في حال استخدمت لسانك وحكيت وحشرت أنفك بكل شغلة نحنا منحتاج شخص متلك بمواصفاتك بس أكيد مافينا نتحملو بكل وقت لهيك بتمنى تكون حذر ومنتبه أثناء تعاملك حتى ماتخسر أشخاص من حولك ..

نصائح ل برج الميزان

الميزان
شخص متوازن مثالي عندك قدرة كبيرة على كسب ود الجميع بطريقتك ودبلماسيتك محبتك للسلام ورغبتك بالعيش المشترك اشيا بتعطيك كتير من الأهمية بمجتمعك لكن أحيانا بتكون سلبي متردد لما بدك تقوت بقصة معينة أو مشروع وهالشي بياخد كتير من وقتك وبيترك انطباع سيء عند المتعاملين معك أنا بنصحك دايما تاخد برأي أصحاب الخبرة وأكيد رح تلاقي حلول ..

نصائح ل برج العقرب

العقرب
أنت حدا خاص عندك كتير من الطيبة والحب بس مو مع الكل عندك حذر من الناس ويمكن هاد الصح بتعاملك بتمتلك شخصية مثيرة بتجعل الآخرين يحاولوا يكتشفوا سرك بس بنفس الوقت أحيانا كتير بتكون بعيد عنن وممكن تنفهم بشكل غلط حتى بتعبيرك عن الحب بتكون غامض وهالشي ممكن يسبب سوء فهم عند الشريك بتمنى منك تعطي فرصة للناس وتقوي ثقتك فين حتى تكون قريب منن ..

نصائح ل برج القوس

القوس
بتحمل بداخلك الكتير من الطيبة والعفوية والصراحة يلي بميزوك وبيعطوك قوة بشخصيتك وقدرة على امتلاك زمام الأمور لكن أنت ما بتنتبه لحالك وبتتصرف بطفولية أحيانا فبتعيش الحياة كأنها لعبة وهالشي ممكن يسبب قلق عند الناس يلي بتتعامل معك يعني أنت بتحاول تحصل على يلي بدك ياه باي طريقة وبتكون كتير عنيد بتمنى تنتبه لهالشي حتى تضل محبة الناس كبيرة الك متل ما بتحس ..

نصائح ل برج الجدي

الجدي
يلي متلك وبقوتك صعب كتير ينكسر انت حدا مصمم ناجح مثابر ليصل للهدف بالرغم انو اهدافك بتتأخر لتتحقق لكن متابعتك الها واصرارك على النجاح من أهم خصالك لكن انت احيانا بتكبر الأمور وبتعيش دور أكبر من عمرك فهالشي بيتعبك وبخليك تحس بصعوبة الحياة بتمنى منك تترك روح الشباب عندك تجن شوي واسمع لنفسك بالحياة ..

نصائح ل برج الدلو

الدلو
قدرتك على التكيف والتعامل مع معظم الناس ونظرتك الجيدة للأمور بالأضافة لحبك للخير وتغيير المستمر من أهم صفاتك بس انتبه من الخروج عن قانون الحياة بشكل غلط .. يعني دايما انت بتحب تكون غير ومميز وملفت بس أحيانا بتكون فكرتك غلط فبتصل لأماكن بتأذيك مشان هيك اسمع رأي غيرك وخليك مميز ضمن المعقول ..

نصائح ل برج الحوت

الحوت
انت مميز عند الآخرين ولديك روح جميلة تملك الكثير من الحب بداخلك وتحاول دائما اسعاد من حولك لكن قد لا تحصل على المقابل ومن أكبر عيوبك هو أنك تشعر الآخرين بالحاجة لك وقد تعطي الحب دون أن تفكر بما سيأتي بعده وقد تدخل في حالات من الحزن والاكتئاب وهذا ما يؤثر عليك لذلك يجب أن تكون مشاعرك موجهة الى الشخص المناسب وفي الوقت المناسب فقط ..